Náttúrulaugar & heilsulindir
Náttúrulaugar á Íslandi
Þótt Ísland sé líklega eitt fallegasta land í heimi er ekki hægt að fara mjög fögrum orðum um veðráttuna. En þetta snýst ekki bara um útlitið því annar stór kostur við landið okkar er að sjálfsögðu jarðhitinn. Eitt af því sem Íslendingar búsettir erlendis sakna hvað mest frá heimalandinu er hitinn og þá er enginn að tala um lofthitann. Á fjölmörgum stöðum um landið sameinast svo þessir tveir stórfenglegu kostir, náttúrufegurð og jarðhiti, í hinum óviðjafnanlegu náttúrulaugum landsins. Sumir baða sig í hlýjum pollum eða heitum ám, aðrir vilja standa í notalegri sturtu undir heitum fossi og hinir kunna að meta sjónarspilið þar sem heitt vatnið flæðir upp úr jörðinni. Á endanum er jarðhitinn ein stærsta auðlind Íslendinga og full ástæða til að njóta hans hvar sem færi gefst.
Heilsulindir á Íslandi
Þau eru fá þéttbýlin á Íslandi sem bjóða ekki upp á að minnsta kosti eina sundlaug og alltaf skal þeim fylgja heitur pottur. Það er í raun reyndar erfitt að greina á milli hvort sé mikilvægara, sundlaugin eða heiti potturinn. Þeir sem ferðast um landið hafa varla heimsótt áfangastað fyrr en þeir hafa setið í heita pottinum og gefið sig á tal við heimamenn. Að láta líða úr sér í kjörhitastigi innan um malandi mannskapinn hlýtur að vera notalegasta þjóðaríþrótt allra tíma. Íslendingar hafa fært þetta menningarfyrirbæri sitt upp á nýtt plan með fyrsta flokks heilsulindum sem finna má orðið um allt land. Þar ræður lúxus ríkjum og áherslan er öll á afslöppun og heilnæmi. Gerðu eitthvað gott fyrir líkama og sál og fylltu á tankana í dásamlegri heilsulind.
